Tarehe iliyowekwa: April 9th, 2021
*Na Maiko Luoga Wanging'ombe*
Mbunge wa Jimbo la Wanging’ombe Mkoani Njombe na Naibu Waziri Ofisi ya Rais TAMISEMI Dkt, Festo Dugange amesema Serikali inaendelea kuboresha miundombinu mbalimbali Wilayani humo ikiwemo sekta za Elimu, Afya, Maji, Umeme, Barabara na maeneo mengine ili kutatua changanoto zinazoikabili Jamii.
Amesema hayo April 09/2021 wakati akizungumza na Wananchi wa Vijiji vya Wanging’ombe na Katenge Kata ya Wanging’ombe mara baada ya kuwasili akitokea Bungeni Jijini Dodoma ili kusikiliza kero zao na kuwapa mrejesho wa changamoto walizompa awali.
Akizungumza na Wananchi hao Dkt, Dugange amesema Serikali inatambua changamoto za Wananchi wa Wilaya ya Wanging’ombe zilizopo kwenye sekta mbalimbali ikiwemo miundombinu ya Barabara, Maji, Afya na Umeme hivyo jitihada za kuzitatua zinaendelea.
Amesema tayari Serikali imetoa fedha za Kitanzania kiasi cha Tsh, milioni mianne na hamsini ili kuboresha miundombinu ya Elimu ikiwemo ujenzi wa Vyumba vya Madarasa na Vyoo vya Wanafunzi katika Shule za Msingi na Sekondari Wilayani Wangingombe.
“Shule ya Msingi Kijiji cha Wanging’ombe tumepata milioni arobaini na sita na laki sita, na Shule ya Sekondari tumepata milioni arobaini na sita na laki sita fedha hizi zitaingia wakati wowote kuanzia sasa kwaajili ya ujenzi wa Madarasa angalau mawili na Vyoo vya Wanafunzi”Dkt, Festo Dugange.
Aidha amewaeleza Wananchi wa Kijiji cha Katenge kuwa Serikali imetoa Fedha za Kitanzania kiasi cha Tsh, milioni arobaini na sita na laki sita kwaajili ya Ujenzi wa vyumba viwili vya Madarasa na vyoo katika Shule ya Msingi Katenge ili kuunga mkono juhudi za Wananchi.
Hatahivyo ametoa wito kwa Uongozi wa Halmashauri wa Wilaya ya Wanging’ombe kukamilisha mapema jengo la Zahanati ya Kijiji cha Katenge ambalo limekaa zaidi ya miaka kumi kwenye hatua ya boma na mwezi februari 2021 Serikali ilitoa fedha kiasi cha Tsh, milioni hamsini kwaajili ya ukamilishaji wake.
