Tarehe iliyowekwa: April 10th, 2021
*Na Maiko Luoga Wanging'ombe*
Naibu Waziri Ofisi ya Rais TAMISEMI Dkt, Festo Dugange ametoa wito kwa Watumishi wa Afya nchini kufanya kazi kwa kuzingatia Taratibu, nidhamu na maadili ya kutoa huduma kwa Wananchi wanaofika kwenye Vituo vya Afya kufuata matibabu.
Ametoa wito huo April 10, 2021 wakati akizungumza na Wananchi wa Kijiji cha Wangutwa Kata ya Uhambule Wilayani Wanging’ombe Mkoa wa Njombe alipofanya ziara ya kikazi kama Mbunge wa Jimbo la Wanging’ombe kwa lengo la kusikiliza kero za Wananchi na kuzitafutia ufumbuzi.
Akiwa kwenye Mkutano wa hadhara Wananchi wa Kijiji hicho walimpa kero kuwa Watumishi wa Afya wanaofanya kazi katika Zahanati ya Kijiji chao mara nyingi hawapatikani kwenye Kituo cha kazi, kutoa lugha mbaya kwa Wagonjwa na kuto toa huduma za haraka huku wakisema hadi wamalize ratiba zao.
“Kwakweli Daktari aliopo hapa na Manesi wengine hawana mahusiano mazuri na Uongozi wa Kijiji, wao wanasema mwenye uwezo wa kuzungumza nao ni yule aliye waajiri sio sisi wa huku Kijijini, kuna wakati tumepoteza Watu wawili hapa kwa kukosa huduma za haraka, Nesi anasema anakula kwanza ndio aje kutibu” alisema Bw, Salumu Ngella Mwenyekiti wa Kijiji cha Wangutwa kwa niaba ya Wananchi.
Kufuatia kero hiyo ya Wananchi kwa Watumishi wa Sekta ya Afya Dkt, Festo Dugange ameahidi kuifanyia kazi na kuchukua hatua za kinidhamu kwa Watumishi watakaobainika kukiuka Taratibu za utumishi wa Umma huku akitoa maagizo kwa Waganga Wakuu wa Wilaya na Mikoa kote nchini kuwasimamia Waganga wa chini ili watoe huduma bora kwa Wananchi.
“Mimi nimelichukua hili, kunatatizo kubwa la kusimamia Watendaji wetu, sio wote wabaya lakini tatizo lipo kwenye usimamizi kote nchini tutachukua hatua za kinidhamu kwa kuzingatia Sheria kwa wote wanaofanya mchezo na Afya za Wananchi, pia natoa wito kwa Waganga Wakuu wa Halmashauri na Mikoa kuwasimamia Watumishi wa Vituo ili watoe huduma sahihi kwa Wananchi” alisema Dkt, Festo Dugange (MB) Naibu Waziri Ofisi ya Rais TAMISEMI.
Mhe, Dkt, Festo Dugange April 10, 2021 alifanya mikutano na Wananchi wa Vijiji vya Wangutwa Kata ya Uhambule, Mtapa na Igwachanya Kata ya Igwachanya Wilayani Wanging’ombe akisikiliza kero zao kama Mbunge wa Jimbo na kuzitafutia ufumbuzi, huku Wananchi wa maeneo hayo wakipongeza jitihada za Mbunge wao.
