BALOZI WA MAZINGIRA AMEWAASA WANANCHI KUJENGA UTAMADUNI WA KUPANDA MITI YA MATUNDA - WANGING’OMBE
Tarehe iliyowekwa: October 8th, 2023
Na. Mwandishi Wetu,Rukia Omary, Balozi wa mazingira, Aihdi Sinene akiwa na Mkuu wa Wilaya ya Wanging’ombe, Mheshimiwa Claudia Kitta wamepanda miti ya matunda Parachichi aina ya Hasi katika Shule ya msingi mpya Igwachanya iliyojengwa kupitia mradi wa BOOST.
Katika Ziara hiyo, Balozi wa Mazingira na msafara wote wamefanikiwa kupanda miche 20 ya Parachichi aina ya Hasi, Miche hiyo imepandwa katika viunga vya shule mpya ya msingi Igwachanya iliyojengwa kupitia mradi wa BOOST, Ofisi ya Mkuu wa Wilaya ya Wanging’ombe, Ofisi ya Mkurugenzi Mtendaji. Akihutubia wananchi wa Kata ya Igwachanya, Balozi wa Mazingira, Aihdi Sinene amenukuu kauli mbiu ya “Tunza mazingira Yakutunze” ikiwa ni kampeni mahususi na muhimu kwa Maisha ya viumbe hai, pia ameongelea umuhimu wa upandaji miti ya matunda kutekekeleza sera ya mazingira, afya, lishe na kupunguza athari za mabadiliko ya tabia nchi na kuepuka kukata miti ovyo. Ujumbe huu wa mazingira ulianzishwa na Mhe. Dkt. Samia Suluhu Hassan hapo awali akiwa ni Makamu wa Rais katika Serikali ya awamu ya tano Makutopora jijini Dodoma na sera hii inaendelea kutekelezwa ili kudumisha utamaduni wa upandaji miti. Mkuu wa Wilaya ya Wanging’ombe, Mhe. Claudia Kitta amesema utamaduni wa kupanda miti ya matunda kama parachichi na matunda mengineyo ya asili yanachangia kupunguza matatizo ya utapia mlo kwa Watoto na baadhi ya aina za matunda hayo yanaweza kuongeza vipato vya wananchi. Hivyo amewaasa wananchi wa Wilaya ya Wanging’ombe kuendelea kupanda miti ya matunda majumbani na taasisi za Umma kwa kufuata taratibu za kitaalamu ili kuleta tija katika jamii na taifa kwa ujumla. Aidha Balozi wa Mazingira, Aihdi Sinene amesema suala la upandaji miti ni la Kitaifa kila mwananchi anawajibu wa kupanda miti kwani husaidia kutunza vyanzo vya maji na kuzuia mmomonyoko wa ardhi na kuifanya jiografia ya mazingira kuwa bora Zaidi. Ameyasema hayo akiwa ameongozana na Mhe. Mkuu wa Wilaya, Katibu Tawala, Kaimu Mkurugenzi Mtendaji Halmashauri, Katibu wa Wazazi CCM. Mapinduzi, Afisa Elimu Kata, Mwalimu Mkuu S/M Igwachanya na wajumbe wengineyo.
