MAKUSANYO YA MWAKA WA FEDHA 2020/2021 YAFIKIA ASILIMIA MIAMOJA NA TISA HALMASHAURI YA WILAYA YA WANGING’OMBE

Tarehe iliyowekwa: April 30th, 2021

Katika kipindi cha kuanzia Julai 2020 hadi machi 2021 Halmashauri ya Wilaya ya Wanging’ombe mkoani Njombe kupitia vyanzo vya mapato ya ndani, imefanikiwa kukusanya fedha za kitanzania kiasi cha shilingi bilioni moja na milioni miasita sawa na asilimia miamoja na tisa ya makisio ya mwaka wa fedha 2020/2021.

Akifungua kikao cha Baraza la Madiwani Halmashauri ya Wilaya ya Wanging’ombe kilichofanyika april 30/2021 kwenye Ukumbi wa Halmashauri hiyo Kata ya Igwachanya, Mwenyekiti wa Halmashauri hiyo Mhe, Bi, Agnetha Mpangile amesema kiasi cha shilingi milioni thelathini na moja nukta tatu kimekusanywa kutoka vyanzo vingine vya mapato sawa na asilimia ishirini na moja ya makisio ya mwaka.

“Hapa bado hatujafanya vizuri tunatakiwa kufuatilia vyanzo hivi kwa undani ili tufanye vizuri, kwa ujumla mapato halisi ya ndani na mengineyo ni Shilingi bilioni moja nukta tisa sawa na asilimia sabini na tisa, makadirio ya mwaka wa fedha 2020/2021” amesema Mhe, Mpangile.

Awali akitoa salamu za Serikali katika Baraza hilo Mkuu wa Wilaya ya Wanging’ombe Mhe, Lauteri Kanoni alieleza kuwa Wilaya hiyo imeshamiri matukio ya vifo vya watu kujinyonga kutokana na sababu ndogondogo za kijamii ikiwemo chuki na wivu wa kimapenzi.

Aidha alisema sababu nyingine ni ramli chonganishi zinazofanywa na watu wanaojulikana kwa jina lambalamba waliopo Wilayani humo ambao hupita kwenye baadhi ya familia na kupiga ramli hizo kisha kumtaja miongoni mwa wanafamilia kuwa anajihusina na ushirikina jambo ambalo hupandikiza chuki kwa wahusika na kuamua kujinyonga.

“Jana tukiwa kwenye uzinduzi wa Mahakama hapa wataalamu wa sheria walisema mtu akifa kwa kujinyonga maana yake hakuna kesi, lakini akinusurika anapojinyonga atakamatwa na kushtakiwa kisheria, lakini tumetoka hapo leo kuna mtu kajinyonga hali hii sio njema” alieleza Mhe, Lauteri Kanoni Mkuu wa Wilaya ya Wanging’ombe.

Katika hatua nyingine Mkuu wa Wilaya ya Wanging'ombe Mhe, Lauteri Kanoni aliwaeleza Madiwani kuwa moto uliozuka asubuhi ya april 30/2021  katika Shule ya msingi Igima Wilayani humo haujasababisha madhara makubwa kwani Wanafunzi na Walimu wote wa Shule hiyo wapo salama zaidi umeteketeza rula kumi, pazia la dirisha na boksi moja la Vitabu.

Baadhi ya Madiwani akiwemo Mhe, Antony Mahwata wa Kata ya Igwachanya walieleza kuwa wapiga ramli chonganishi wameshamiri katika Vijiji tofauti Wilayani humo wakifanya kazi ya kutapeli Wananchi pamoja na kupandikiza chuki kwa jamii huku wakilitaka jeshi la Polisi kuwakamata wahusika hao ili kutokomeza kabisa tabia hiyo.